भुँइ कुइरोहरु उठ्न नपाउँदै

भुवादार बादलको सप्को ओढेर

आँखामा पिरो धुँवा बोकी

आली-आलीमा

भारहीन पैतालाहरु टेक्दै-टेक्दै

फटक-फटक

लामा पाइला चाल्दैछिंन असार

हतार-हतार ।।

बाटोमा कसैले अल्मल्याउनु हुन्न उसलाई

एकसुरमा अघि बढिरहेकीछे ऊ

पिठ्युमा स्याखु ओढेर पनि

पानीले भिझेकी छे

शिरमा छत्री जोडेर पनि

पसिनाले निथ्रुक्क रुझेकी छे ।

एकनास लम्कीरहेकीछे ऊ

दृश्यहरु आँखाको डिल नाघेर

हिलोमा डुबुल्की मारिरहेछन्

यता

बिश्वासको गह्रा भ्वाङ्ग परेकोछ

त्यसलाइ टाल्नु छ

उता

आस्थाको डिल भत्केको छ

त्यसलाइ उकास्नु छ

पानी येथेष्ठ पर्ने हो-होइन

मिहेनत जस्तै

मंसिरमा परिश्रम फल्ने हो-होइन

चिन्ताग्रस्त छे ऊ ।।

तर पनि

लिएर उत्साह भरिएका आँट

खोला-खोल्सीहरु सँग मित लाउन

छहरा-पहरासँग गित गाउन

लम्कीरहेकी छे फाँट-फाँट

हतार-हतार

यसपालिको असार ।